বন্ধুয়া মিলিবা ফুল বনে গো সজনি সই

বন্ধুয়া মিলিবা ফুল বনে গো সজনি সই।
বন্ধুয়া মিলিবা ফুল বনে ।।
জিবাই এ কইবার লাগৈন হুসাইরে ডাকিয়া।
চল যাই ফুল বনে ফুল তুলি গিয়া ।।
ফুল যে ফুটিয়া রইছে কদম গাছের জড়ে।
ফুলের খবর হুনিয়াত হুসাই আইলা লড়ে।।
ফুল যে ফুটিয়া আছে এওলা বনের কাছে।
ফুল যে ফুটাইতে পারে খুশির উপর আছে ॥
কদম গাছের জড়ে ফুল রইছে ফুটিয়া।
জিবাই বলে হুসাইরে ফুল দেখি গিয়া ॥
হুসাই বলে জিবাই ওরে লইয়া যাইতায় মোরে।
আখাইরে ডাকিয়া লও বুঝাই আউকা করে।।
হুসাই, বুধাই, আখাই কুয়াই চারি চলৈন মানে।
জিবাইরে লইয়া যাইন ফুল বৃন্দাবনে।।
চারিজন চলিয়া যাইন জিবাইরে সাথে লইয়া।
মুরশিদ ভজিয়া ফুল চাও বিচারিয়া।
জিবাই যাইতা ফুলবনে খন্নাছ হইল বলি।
দরখততুবা গাছের মাঝে ধরিয়াছে কলি ॥
আয়াতুল কুরছি হাজার বার দমে পুরাইব।
তনের মাঝে ফুল ভাই আপনে ফুটিব ॥
মুরশিদ ভজিয়া ফুল যে জন ফুটাইব।
সৈয়দ শাহনূর তার জুনাবে লাগিব ॥